शाखा अधिकृत तहको तयारीका लागि अध्ययन गर्नैपर्ने विषयवस्तुहरू

• नेपालको संविधान पढ्नुपर्छ। संविधानका निर्देशक सिद्धान्तहरु, संविधानले राज्यलाई दिएको निर्देशन, मौलिक हक, संबैधानिक निकायहरु, राज्यको आर्थिक कार्यप्रणाली लगायत कुराहरुलाई एकदमै क्रिटिकल भएर अध्ययन गर्नुपर्छ । शब्दले के भन्न खोजेको छ, व्यवहारमा के छ भन्ने कुराहरु उसले पढ्नुपर्छ ।
• चालु आवधिक योजनालाई निकै महेनत गरेर पढ्नुपर्छ ।
• निजामति सेवा ऐन । निजामती सेवा ऐनले समग्र निजामति प्रशासनलाई दिशानिर्देश गर्ने भएकाले उक्त ऐन, नियमावलीहरुलाई मसिनो गरि पढ्नुपर्छ ।
• त्यसपछि चालु बर्षको बजेट, नीति तथा कार्यक्रम र आर्थिक सर्वेक्षणका तथ्यांकहरु गहन रुपमा अध्ययन गर्नुपर्छ । यससँगै नेपालको दिगो विकासको लक्ष्यलाई पनि राम्रोसँग पढ्नुपर्छ ।
• उल्लेखित विषयहरु पढ्दा हल्का रुपमा नभए हरेक शब्दको आशय र व्यवहारमा के भइरहेको छ भन्ने कुरा ख्याल गर्ने गरि पढ्नुपर्छ ।
• त्यसपछि पाठ्यक्रममा भए अनुसारको विषयवस्तुको सन्दर्भ सामाग्री कलेक्सन गर्नुपर्छ ।

घोक्ने भन्दा पनि विधिहरू सिक्नुपर्छ

• निजामती सेवाका लागि लोक सेवाले लिने परीक्षा उत्तिर्ण गर्न सहज छैन । विद्यालय वा विश्वविद्यालयस्तरको मिहिनेतले लोक सेवाको परीक्षामा सफल हुन सकिँदैन । तसर्थ लोक सेवाको परीक्षामा सहभागी हुँदा अध्ययनमा नयाँ शैली र उपाय अपनाउनु जरुरी हुन्छ ।
• विविध विधाबाट अनेकौं प्रश्नहरू सोधिने भएकाले अध्ययनको दायरालाई फराकिलो बनाउनुपर्छ । सोही अनुसारका अध्ययन सामग्रीको जोहो गर्नु आवश्यक हुन्छ ।
• पढेका विषयमा निश्चिन्त हुनुपर्छ । खासगरी वस्तुगत प्रश्नहरूमा उस्तै – उस्तै लाग्ने उत्तरका धेरै विकल्प हुने भएकाले पढ्दा दोधार नहुने गरी निश्चित हुनुपर्छ ।
• उत्तर दिँदा सृजनात्मक र मौलिक विधि अपनाउनुपर्छ । धेरै लामो लेखेर समय खेर फाल्नेभन्दा प्रश्नले मागेअनुसारको छोटो उत्तर दिनुपर्छ ।
• अधिकांशको बानी पुस्तक मज्जाले घोक्ने हुन्छ । र, त्यही घोकेका आधारमा प्रश्नपत्रको हल गर्छन् । आफूले घोकेको प्रश्न परीक्षामा आए त ठिकै होला, तर अर्कै आयो भने प्रश्नै छाड्नुपर्ने हुन्छ । यसको समाधानका लागि घोक्नेभन्दा पनि विधिहरू सिक्न जरुरी हुन्छ । यो भनेको माछा मार्नेभन्दा माछा मार्ने विधि सिकाएजस्तो ।
• आफूलाई जस्तोसुकै प्रश्नका लागि पनि तयार राख्नुपर्छ । यस्तो आउँछ/यस्तो आउँदैन भनेर अध्ययन गरियो भने परिणाम अनपेक्षित पनि आउनसक्छ ।