देश दर्शन (KYC) यात्रा: मोरङदेखि धनकुटा हुँदै आध्यात्मिक बराहक्षेत्रसम्म

BAT40 कोशी समूहको अविस्मरणीय अनुभव

हाम्रो भिडियो अवश्य हेर्नुहोस्।

“देश चिन्ने हो भने त्यसलाई अनुभूति गर्नुपर्छ”

यसै भावनालाई आत्मसात गर्दै नवनियुक्त शाखा अधिकृत (BAT40) का रूपमा हामीले देश दर्शन (Know Your Country - KYC) कार्यक्रम अन्तर्गत २०८२ चैत १४ गते मोरङ र धनकुटा जिल्ला भ्रमणको यात्रा प्रारम्भ गर्‍यौं।

विराटनगर: प्रशासनिक अनुभव र यथार्थको झलक

पहिलो दिनको बसाइ विराटनगरको होटेल स्वागतममा रह्यो। यहाँ हामीले मुख्यमन्त्री तथा मन्त्रिपरिषद् कार्यालय, कोशी प्रदेश र जिल्ला प्रशासन कार्यालय मोरङमा अन्तरक्रिया गर्ने अवसर पायौं। हालैका घटनाका कारण क्षतिग्रस्त बनेको सरकारी संरचनाले हामीलाई शासन प्रणालीका चुनौती र संस्थागत स्थायित्वबारे गहिरो रुपमा सोच्न बाध्य बनायो। आन्तरिक मामिला तथा कानून मन्त्रालयमा भएको छलफलले सेवा प्रवाह, अन्तरतह समन्वय र सम्भावनाहरूबारे व्यावहारिक दृष्टिकोण प्रदान गर्‍यो।

भेडेटार हुँदै धनकुटा: प्रकृति र संस्कृतिसँगै

तराईबाट पहाडतर्फको यात्रामा भेडेटारको शीतल हावासँगै हामी धनकुटाको जाम्जेस्थित मनकामना सामुदायिक होमस्टे पुग्यौं। स्थानीय संस्कृतिमा घुलमिल हुँदै बिताएका ती क्षणहरू यात्राका सबैभन्दा आत्मीय पलहरूमध्ये एक बने।

तमोर नदी र औद्योगिक सम्भावना

सप्तकोशीको प्रमुख सहायक नदी तमोर र त्यससँग जोडिएको तमोर करिडोर कोशी प्रदेशको आर्थिक जीवनरेखाका रूपमा देखियो। त्यसैगरी, धनकुटा औद्योगिक ग्राममा गरिएको अवलोकनले घरेलु तथा साना उद्योगहरूको सम्भावना र चुनौतीबारे स्पष्ट चित्र दियो।

आठपहरिया समुदाय: संस्कृति र पहिचान

धनकुटामा बसोबास गर्ने आठपहरिया समुदायसँग उहाँहरूको ऐतिहासिक “ठूलो घर (वाडाङ्मी)” मा गरिएको अन्तरक्रिया हामीलाई सांस्कृतिक विविधताको गहिरो अनुभूति गराउने अवसर बन्यो।

पाख्रिबास: कृषि अनुसन्धान केन्द्र

कृषि अनुसन्धान केन्द्र, पाख्रिबासमा हामीले आधुनिक कृषि प्रविधि र अनुसन्धानका प्रयासहरू नजिकबाट बुझ्ने अवसर पायौं। यहाँको हरियाली र शान्त वातावरणले मनलाई अलगै आनन्द दियो।

प्रकृति र अध्यात्म: तीनजुरे, पाथिभरा र वसन्तपुर

यात्राकै क्रममा हामी तीनजुरे (लालिगुराँसको राजधानी), पाथिभरा भगवती मन्दिर, र वसन्तपुरस्थित युमा सांस्कृतिक संग्रहालय पुगेका थियौं। यी स्थानहरूले प्रकृति, अध्यात्म र सांस्कृतिक सम्पदाको अद्भुत संयोजन प्रस्तुत गरे।

बराहक्षेत्र: आस्था र प्रकृतिको संगम

सुनसरी जिल्लामा अवस्थित बराहक्षेत्र धाम कोका र कोशी नदीको पवित्र संगममा रहेको यो स्थल नेपालका चारधाममध्ये एक हो। यहाँ भगवान विष्णुको वराह अवतारको पूजा गरिन्छ। प्रकृति र आध्यात्मिकताको यस्तो संगमले हाम्रो यात्रालाई थप अर्थपूर्ण बनायो।

धरान र बुढासुब्बा: संस्कृति र श्रद्धा

धरानस्थित श्रमसंस्कृति पार्क र प्रसिद्ध बुढासुब्बा मन्दिरले हाम्रो यात्रालाई सामाजिक र धार्मिक आयाम थपिदियो।

यात्राको समापन: अनुभवको संगालो

यसरी ज्ञान, अनुभव र अविस्मरणीय सम्झनाहरू सँगाल्दै हामी सिन्धुली हुँदै काठमाडौं फर्कियौं। यो यात्रा केवल भ्रमण मात्र थिएन। यो नेपाललाई बुझ्ने, महसुस गर्ने र आत्मसात गर्ने प्रक्रिया थियो।