म गुल्मी जिल्ला, सत्यवती गाउँपालिका–६ ढावमा जन्मिएँ र त्यहीँ हुर्किएँ। मेरो प्रारम्भिक शिक्षा र एसएलसीसम्मको अध्ययन रुद्रावती माध्यमिक विद्यालयबाट पूरा भयो। बाल्यकालदेखि नै केही ठूलो गर्ने सपना थियो।
डाक्टर बन्ने लक्ष्य लिएर म ११ र १२ मा विज्ञान विषय अध्ययन गर्न तानसेनको न्यु होराइजनमा गएँ। कक्षा १२ पछि एमबिबिएस प्रवेश परीक्षाको तयारी पनि गरेँ। तर जीवनले मलाई अर्को बाटो देखायो—पूर्ण छात्रवृत्तिमा डाक्टरमा नाम ननिस्किएपछि म BSc Microbiology पढेँ।
विदेश अध्ययन गर्ने सोच पनि थियो, तर मेरो बुवाको चाहना र मेरा आदरणीय सर, नेपाल सरकारका उपसचिव रुकमाङ्गत अर्यालज्यूको मार्गदर्शनले मलाई लोकसेवा तर्फ मोडिदियो।
२०७५/७६ मा लोकसेवा तयारीको समयमा संघीय संरचनाको परिवर्तन, कर्मचारी समायोजन र अदालतका मुद्दाका कारण शाखा अधिकृत परीक्षा नियमित हुन सकेन। त्यही समयमा मैले खरिदारको परीक्षा पास गरेर जिल्ला अदालत भक्तपुरमा सिफारिस भएँ।
त्यसको २ महिनामै स्थानीय तहको अधिकृत पदमा पनि नाम निकाल्न सफल भएँ र प्रतापपुर गाउँपालिकामा खटिएँ।
त्यो मेरो जीवनको वास्तविक “फिल्ड लर्निङ” थियो।
कुनै तालिम बिना, नयाँ संरचना, सीमित स्रोत र ठूलो जिम्मेवारी बीच हामीले कानुन निर्माण गर्यौं, शाखा संरचना बनायौं र प्रशासनिक प्रणाली स्थापित गर्यौं। नेतृत्व परिवर्तन, अध्यक्षको निधन र प्रशासनिक अस्थिरताबीच पनि मैले दोस्रो प्रमुख व्यक्तिको भूमिकामा काम गर्नुपर्यो।
पछि सुनवल नगरपालिकामा राजस्व शाखा प्रमुखको रूपमा काम गर्दा राजस्व वृद्धि, ठेक्का व्यवस्थापन र आर्थिक प्रणाली सुधारमा सक्रिय भूमिकामा रहेँ।
यस बीचमा कामको चाप, परिवारिक जिम्मेवारी र कठिन परिस्थितिका बाबजुद पनि मैले आफ्नो अध्ययनलाई निरन्तरता दिएँ।
अन्ततः २०८२ को संघीय लोकसेवा आयोगको शाखा अधिकृत परीक्षामा सफल भई हाल म BAT-40 अन्तर्गत नेपाल प्रशासनिक प्रशिक्षण प्रतिष्ठान (स्टाफ कलेज) मा आधारभूत प्रशासनिक तालिम पूरा गर्दै छु।
हाल म जिल्ला प्रशासन कार्यालय, भरतपुर महानगरपालिका र मालपोत कार्यालयमा कार्यअनुभव लिई प्रशिक्षणको अन्तिम चरणमा छु।
आज म यहाँ छु, केवल परीक्षाबाट होइन—अनुभव, संघर्ष र निरन्तर प्रयासबाट बनेको यात्राको परिणामस्वरूप।
0 Comments
Any questions or comments? Drop below. Please keep in mind that it must be a meaningful conversation relevant to the topic.